News

صبري العيكورة يكتب: موضوع (فولكر) ده ماكل معاي جمبة خااالس …!!

بقلم. صبري محمد على(العيكورة)

حقيقة لم استطع ان اقنع نفسي بقراءة التصريح المنسوب مؤخرا للفريق ياسر العطا بحق اعضاء لجنة ازالة التمكين و حكاية (الشكر والاشادة) التى وردت فى حق هؤلاء المتهمين ! (لاحظ انا ما قلت مجرمين) فالقضاء وحده من يملك هذا الحق (حلو كده)؟

لم اقتنع ولو للحظة واحدة ان اقرأ هذا الكلام لا توقيتا ولا منطقا و لا اقتناع (ساااكت) بعيدا عن (لايف) خالد عجوبة الذى ذكر فيه ان الحاج فولكر (يدفع) لجماعة اربعة طويلة بالدولار ! و(قال ترجموا ليهو كلامي ده)
ده منو يا (عب باسط) ؟ ده خالد عجوبة .

و ( المحيرني) بعد التحدي ده كلو الجماعة (تمممم) سكتوا لم ينف احدا منهم هذه التهمة الخطيرة لا مكتب الامم المتحدة بالخرطوم و لا ناس اربعة طويلة !

طيب علاقة تصريح ود العطا بكلام ود عجوبة شنو؟
افتكر ده سؤال مهم جدا قول لى كيف يا (عب باسط)؟
اقول ليك انا

لاحظ معاي توقيت التصريح المنسوب لقناة (سودانية ٢٤) والمقطع والرابط (الحايم) جاء بعيد (مصيبة) خالد عجوبة العملها فى القحاتة مؤخرا (الشاشة و الدولارات والمساء) يعنى زي حكاية (الشوق والريد)

ود العطا المفروض انه مشغول تلك الايام بالعيد مع وليداتو ! لكن قال ليك لا ! ياعمك برضو بيناتنا (عيش و ملح) وكده ! فطلع بتصريحه المُجمل لرزايا (قحت) لا مش كده وبس قال لما يسمي ب (ملوك الاشتباك) إننا لا نكرهكم ! دي تفهم منها شنو يا عب باسط؟ انا غايتو ما بكتبا لكن افهموها براكم .

طبعا فولكر هو المستفيد الوحيد من تصريح ود العطا قول لى كيف !
اقول ليك انا …

بتخفيف (الضغط الجوي) والهاء الراي العام عن التهمة الخطيرة التى (ان صحت) ستقدح فى مصداقية الامم المتحدة وتهز ثقة المجتمع الدولي فيها وتهدد سيادة واستقلال الدول . وستقلب موازين الدنيا السياسية واذا قراناها من هذه الزاوية يمكن ان نقرأ الهدف الخفي من (مديح الفريق ياسر) .

فبدلا من ان يركز الرأي الرسمي والشعبي على (شمار) ود عجوبة و عملة فولكر السودا ! فسيكون التركيز (الفريق ياسر العطا قال …) وينسي الناس موضوع الدولارات (فاهمني يا عب باسط) ؟

وتحت هذا السيناريو المتوقع سيمضي المخطط الدولي لتفتيت السودان .

عشان كده (خلونا) من حكاية سلك كويس ومش عارف وجدي صامولة زول نزيه و غيره من كلام (الورنيش العطاوي ده) . (ورونا) الحقيقة

الزول ده أداهم دولارات واللا ما اداهم) ؟

قبل ما انسي : —-
نقل عن (الخال) حميدتي (ما معناه) ان نميري لو بعث من مرقده لسلموه السلطة لانه رئيس (كارب قاشو) !

ود العطا يقول عن متهمين امام القضاء بانهم ناس كويسين .!

الكلام ده تفهم منه شنو يا (عب باسط)؟
نقول غلبتهم مثلا ؟


اضغط هنا للانضمام لمجموعات الانتباهة على تطبيق واتساب



Supply hyperlink

Leave a Reply

Your email address will not be published.

close